Sp og Ap mest fram på Rogaland-måling

Senterpartiet gjer ei kanonmåling i Rogaland samanlikna med stortingsvalet i 2013. Også Ap aukar oppslutninga i fylket, mens Frp fell markant.
innenriks

Sp er verkeleg i medvind om dagen og får ei oppslutning på 10,1 prosent på målinga som Sentio har utført på oppdrag for Høgre. Ved stortingsvalet fekk partiet ei oppslutning på berre 5,2 prosent i Rogaland. Dersom målinga hadde vore stortingsvalresultatet, ville partiet dobla talet på mandat frå eitt til to i fylket.

Ap aukar oppslutninga frå 22,6 til 25,7 prosent og ville sikra seg ein fjerde representant frå Rogaland på Stortinget med eit slikt valresultat.

Høgre fell marginale 0,8 prosentpoeng til 29,3 prosent, men verre går det med regjeringspartnar Frp som gjorde eit brakval i Rogaland med 18,7 prosents oppslutning for tre og eit halvt år sidan. Partiet fell 5,1 prosentpoeng og ville mista eitt av sine tre mandat på Rogaland-benken.

Feilmarginen ligg i intervallet 4,3 prosentpoeng for Høgre og 0,6 prosentpoeng for Pensjonistpartiet.

Dei andre partia får slik oppslutning på målinga samanlikna med valresultatet i Rogaland i 2013: KrF: 9,2 prosent (-1,4 prosentpoeng), Venstre 4,0 (-0,5), SV 3,3 (0,0), MDG 2,1 (-0,1), Raudt 0,9 (0,5), Pensjonistpartiet 0,5 (0,0), Dei Kristne 0,0 (-1,0), andre parti 1,3 (0,7).

(©NPK)