Fellingsresultatet er klart

Fellingsresultatet for hjort i Stranda kommune per 23. desember, syner ein fellingsgrad på heile 93 prosent.

God fellingsgrad: 93 prosent av tildelte dyr vart felt i hjortejakta 2016. ARKIVfoto  Foto: Peter Vibe/Colourbox.com

Nyhende

Det vart i 2016 tildelt 657 dyr på dei ulike valda i Stranda, og 614 dyr vart felt.

Av fordelinga på dei ulike gruppene, ser vi at det vart felt flest eldre dyr - 126 eldre bukkar og 155 eldre kollar. Det vart felt 98 halvanna år gamle bukkar, medan 89 halvanna år gamle kollar vart felt.

Valda har ein fellingsgrad som varierar mellom 50 prosent til 114 prosent. Lågast fellingsgrad har Oaldsbygda hjortevald, medan nedre Sunnylvsbygda hjortevald har høgast fellingsgrad i prosent.

Hjortestammen i Stranda har auka jamnt dei seinare åra, og det har vorte innført ei rekke tiltak for å få kontroll over auken. Mellom anna har ein senka vektgrensene på skrapedyr, og det har blitt innvilga fleire løyver fordelt på valda.

Vårteljinga av hjort som vart gjort i april/mai i år, synte ei alarmerande mengd hjort - 823 hjort vart telt - nesten 100 fleire enn i fjor. Sunnylven, Stranda Sør og Liabygda vart då peika ut som område for å setje inn tiltak.

Hjortejakta føregjekk i perioden 1. september til 23. desember.