Har bestilt ny sightseeingbåt

Skipsbyggaren må bygge om produksjonshallen sin for å få plass til den nye katamaranen som skal gå på Geirangerfjorden.

Styret i Geiranger Fjordservice har signert kontrakt med skipsbyggaren. Frå venstre er Øystein Maraak, Arild Gjørvad, dagleg leiar Helle Firhøj Jensen, Arnfinn Westerås, Bjørn Petter Tunheim, styreleiar Leif Magne Klubbenes og Rune Midtkandal, områdesalssjef i Maritime Partner. 

Illustrasjon av den nye turistbåten.  Foto: Maritime Partner

Nyhende

Geiranger Fjordservice har inngått ein avtale med Maritime Partner om kjøp av ein ny turistbåt for fjordsightseeing.

Dette vil vere den største båten selskapet har bygt – og dei må altså sjølv bygge om for å få plass til å lage den.

Tenker grønt

Katamaranen blir laga av miljøvenleg og resirkulert materiale, og vil bruke eit miljøvenleg framdriftssystem så langt dette er mogleg. Det blir blant anna lagt til rette for at fartøyet skal kunne drivast med hydrogen, når dette blir mogleg.

– Meir enn 50 prosent av skroget og overbygget blir bygd i allereie resirkulert aluminium, som kan resirkulerast på nytt når båten ikkje lenger er i bruk, seier Maritime Partner i ein uttale.

Designa for utsyn

Båten vil den ha plass til 147 passasjerar.

Store vindaugsareal skal sørgje for at også dei som er inne i salongen skal få nyte den flotte naturen.

Utvidar flåten

Geiranger Fjordservice seier i ein uttale at responsen blant turistar har vore så positiv at dei såg behov for å utvide flåten. Dei kjem til å behalde båten dei brukar i dag, M/S Geirangerfjord.

I tillegg til fjordsightseeing, er den nye båten også lagt til rette for charterturar og reservebåtoppdrag for hurtigbåtar i sommarsesongen.

Ifølgje Maritim Magasin vil den vere leveringsklar til neste sesong, 30. mai 2018.