Dansk fotballspelar testa positivt på kokain

Den danske fotballspelaren Ken Ilsø er suspendert etter å ha testa positivt på bruk av kokain.
sport

Det opplyser det australske fotballforbundet. Ilsø speler til dagleg fotball for den australske klubben Adelaide United.

32-åringen leverte ein positiv prøve allereie i januar.

Testen inneheldt stoffet bensoylekgonin, eit stoff som er på WADAs liste over forbodne stoff.

– Medan etterforskinga går føre seg er Ilsø utestengt frå å spele i A-League og alle andre sportsgreiner under WADA, opplyser det australske forbundet.

Ilsø seier han samarbeider tett med PFA (fagforeininga til spelaren) i saka, og at dei ventar på svar frå B-prøven.

– Eg kan ikkje uttale meg ytterlegare før resultata har komme. Til all fansen våre: Hald fokus på laget. Vi er i ein kritisk fase av sesongen og laget har bruk for dykk, uttaler Ilsø, som berre har scora tre mål på 19 kampar denne sesongen.

Klubben har så langt hatt ein tung sesong i A-League, og ligg på 6.-plass av ti lag etter 22 serierundar.

(©NPK)