Vil ha tips etter kattunge-dumping

Dyrebeskyttelsen Møre og Romsdal ber om tips etter at tre kattungar vart funne dumpa i Geiranger før helga.

Tre kattungar vart funne midt i vegen i Geiranger fredag ettermiddag. Dei tre har no tilhald på Skjåk, og er klare for adopsjon når dei er tolv veker.  Foto: Foto: Privat

Nyhende

Dei tre kattungane på rundt sju, åtte veker vart funne dumpa på FV63 mellom Grande camping og Geiranger sentrum.

- Dei vart funne fredag ettermiddag i femtida, midt i vegen i ein sving. Det er to hanner og ei hokatt, seier Kristin Slålien Gjerdet på Skjåk.

Ho tek no hand om kattene, etter at ein ven av ho kom med dei i helga.

- Eg hadde ikkje hjarte til noko anna, seire ho.

Ber om tips

No ber Dyrebeskyttelsen Møre og Romsdal og Gjerdet sjølv om tips frå publikum rundt hendinga:

– Skulle nokon vite noko om hendinga, ta kontakt med oss, skriv Dyrebeskyttelsen Møre og Romsdal på si Facebook-side.

- Dei var heilt tørre i pelsen då dei vart funne, og det rekna i Geiranger fredag. Så dei kan ikkje ha ligge lenge. Men dei låg midt i vegen, som ein bylt, fortel Gjerdet.

Mor sannsynlegvis påkøyrt

Ein vaksen hokatt vart funne påkøyrt i same området, mykje tyder på at det var mora til kattungane.

For kattungane blir det ei lukkeleg løysing, og dei trivs innomhus fortel "reserve-mor" Gjerdet:

- Dei er sju/åtte veker, og skal få vere hjå meg til dei er tolv veker gamle. To er tinga vekk allereie. Dei er folkevande, og går på do sjølv. Og dei har ein kjempeapetitt, ler Gjerdet.